சௌடேகுப்பம் பகுதியில் பெண் வியாபாரியிடம் தாலி சரடு பறிப்பு வழக்கில் இருவர் கைது.

திருப்பத்துார் அருகே சௌடேகுப்பம்  சேர்ந்தவர் குப்புசாமி. இவர் அதே பகுதியில் மளிகை கடை நடத்தி வருகிறார். இந்நிலையில், கடந்த ஆண்டு மே 20ம் தேதி இவரது மனைவி கோவிந்தம்மாள் மளிகை கடையில் இருந்தார். அப்போது ஒரே பைக்கில் வந்த இருவர், கடையில் பொருட்கள் வாங்குவது போன்று வந்தனர்.

அப்போது கோவிந்தம்மாள் கழுத்தில் அணிந்திருந்த தங்கத் தாலி சரடை பறிக்க முயன்றனர். இதை சுதாரித்துக் கொண்ட கோவிந்தம்மாள் உடனே தாலிச்சரடை இறுக்கி பிடித்துக் கொண்டார். இருப்பினும் சுமார் இரண்டு பவுன் அளவில் துண்டான தாலி சரடை பறித்து சென்றனர். இது குறித்து கோவிந்தம்மாள் கொடுத்த புகாரின் பேரில், திருப்பத்துார் கிராமிய போலீசார் வழக்கு பதிவு செய்து விசாரணை நடத்தி வந்தனர். 

இந்நிலையில், கிராமிய போலீசார் திருவண்ணாமலை மெயின் ரோட்டில் ரோந்து பணியில் ஈடுபட்டனர். அப்போது சந்தேகத்தின் பேரில் இருந்த இருவரை பிடித்து விசாரணை செய்ததில்,இருவரும் வேலுார் மாவட்டம் விரிஞ்சிபுரம் பகுதியை சேர்ந்தவர்கள் சுதாகர்(29), அஜித்குமார்(21). என தெரிந்தது. மேலும் சம்பவத்தன்று கோவிந்தம்மாளிடம் தங்கத் தாலி சரடு பறித்துச் சென்றது தெரிந்தது. இதையடுத்து போலீசார் இருவரையும் கைது செய்தனர்.

- மாவட்ட செய்தியாளர் மோ. அண்ணாமலை.